Charta qua Girardus dat monasterio Cluniacensi curtilum in villa Casal Viral.
In nomine Verbi incarnati. Ego Girardus dono ad locum Cluniacum curtilum unum in villa quam dicunt Casal Viral, quantum aspicitur; qui terminat a mane via publica, a medio die terra Sancti Saturnini, a sero terra Fulchardi, a cercio terra francorum. Hanc autem donationem in eo tenore facio, ut quamdiu vixero teneam et singulis annis unum sextarium de annona exsolvam; et post meum discessum ad jam dictum perveniat locum. Actum supradicta villa publicę. S. Girardi. S. Tece et Agię et Rollanni et Gausmari et Fulchardi et Briccii et Duranni, Landoaldi, Johannis et Edoni. Regnante Hugone anno VII.